機票攻略第一回，同大家分享左買機票前要知邊間航空公司有飛你想飛既目的地。
咁就可以更清楚知道邊間公司既優惠真係關你事！
而呢一回既機票攻略，將會分享下買機票時知左會更加好既技巧，會係基礎少少既資訊。
【機票攻略】第二回 – 買廉航機票時要知既技巧！
科技發達，依家買機票，相信唔少朋友都會網上自己買，唔使再假手於人
所以呢一回，Flylum就會講下買機票果陣要留意既事項，特別係廉航方面：
- 機票姓名一定要正確
- 絕大部份情況下，證件號碼等資料其實可以後補
- 留意網站內自動揀選的收費項目（例如：旅遊保險、選座位等）
- 留意寄艙行李的細節
- 俾錢前睇清楚旅行日期同地點＋航班時間
機票姓名一定要正確
嗱！買機票果陣，最最最緊要真係唔好入錯名，機票名要同證件上既名相符！
尤其幫朋友買機票昤，更加要留意，要跟實出發用既證件上面個名稱輸入
用以上既樣本證件做例子，佢個名係：KAM HEI NIN
咁買機票果陣，姓/ Family name/ Last name/ Surname就要入：KAM
名字/ First name/ Given name就要入：HEI NIN
小心串法，同埋一粒字都唔好漏
*幫朋友買機票，記得要問清楚對方證件有冇英文名：TOM, PETER, MARY果d呀！有就記得要入埋喇！
否則，買完先發現錯漏的話，好大機會要額外俾錢修正，隨時個費用仲貴過你搶返黎既平機票
咁就唔抵喇！所以，機票名稱記得再三檢查冇打錯！
絕大部份情況下，證件號碼等資料其實可以後補
買機票最重要係個名，其次性別都唔好揀錯，至於生日同埋其他護照資料，其實錯左都冇太大問題
甚至乎你買機票果刻冇證件係手，亂咁入證件號碼、證件有效期，都唔成問題
因為去櫃檯check in既時候，地勤係可以免費幫你更新返
當然，買機票果刻你有齊資料就更加好啦
不過，Flylum整合完廉航資料既時候，發現其實都唔係太多航空公司訂票果陣需要證件資料
所以，見到機票做優惠既時候，唔使驚冇證件係手冇得搶架！
留意網站內自動揀選的收費項目
買機票既時候，要記得一直留意住個價錢
因為好多時網站會幫你自動揀選左額外收費既項目，例如：行李、旅遊保險等等
搶機票過程好趕急，但記得俾錢前一刻要睇清楚有冇俾網站預設左一d你根本唔需要既項目！
留意寄艙行李的細節
廉航既票價好多時係未包寄艙行李，所以要小心留意有關寄艙行李既細節
有d航空公司要係訂票果刻確定買幾多寄艙行李，後加的話就會貴左
同埋有d航空公司既寄艙行李係會以件數計算
*Flylum會係稍後既章節講更多有關廉航寄艙行李既資料
俾錢前睇清楚旅行日期同地點＋航班時間
鬼唔知阿媽係女人咩！雖然係咁，但都要苦口婆心提一提大家
因為搶平飛既時候，十萬火急，試完果日又試果日有冇平
試試下呢，就亂鬼晒，好易出錯！想買11月就可能禁錯左10月～
辛辛苦苦搶張平機票返黎，買錯左就得不償失！
所以，切記！臨俾錢果刻，停一停，睇一睇！
睇清楚！！！旅行日期同地點＋航班時間 ，仲有個名有冇入岩！！！！
第二回關於機票既攻略就係咁多喇！呢一回會係傾向基礎入門
下一回Flylum將會分享真係搶平機票既關鍵攻略，密切留意！ :)
