機票攻略第三回,同大家分享左搶廉航機票既必殺技
提升搶到廉航機票既機會,但確實搶唔搶到岩心水既平飛,實在有太多唔同因素影響。
而呢一回既機票攻略,將會詳盡分析有關廉航行李既資訊,等大家慳得一蚊得一蚊!
【機票攻略】第四回 – 廉航慳埋件行李!
想飛得平,除左搶至低價既廉航機票外,其實加購寄艙行李都係好關鍵既一環!
去旅行唔係個個都就咁靠個背囊就出到發,好多時都要寄艙行李。而普遍廉航既票價就未包寄艙行李,買完機票加加埋埋,平飛好易變到唔係咁平。等Flylum係呢一回同大家詳盡咁分析下有關行李既部份:
- 廉航行李既入門概念
- 廉航行李既注意事項
- 一圖盡覽各廉航既行李資訊 (適合唔想睇晒咁多字既朋友)
- 各廉航行李分析及購買貼士
廉航行李既入門概念
劈頭既時候,有幾個概念係需要知左先:
- 行李不限件數
- 行李以件數計
- 訂票後加購行李
1. 行李不限件數
行李不限件數,即係解係一個寄艙行李重量入面,只要唔超過總重量,幾多件行李都無問題
例子:20kg寄艙行李,行李不限件數,你可以分別將兩件10kg既行李一同寄艙,只要唔超出20kg就可以
2. 行李以件數計
行李以件數計,即係解係一個寄艙行李重量入面,只能以一件行李形式托運
例子:20kg寄艙行李,行李以件數計,你只能夠托運單件不超過20kg的行李
3. 訂票後加購行李
訂票後加購行李,即係解訂完晒機票,可以係出發若干日前再決定購買寄艙行李
例子:係8月8日完成訂購11月15日出發東京既機票,係11月1日先確定加購行李
廉航行李既注意事項
買得廉航既機票,通常都想節省機票費用,好多時一分錢一分貨係真,想平有時係要有d犧牲!寄艙行李方面,坐廉航想真係坐得平,可以嘗試係呢方面著手喇。
- 短程玩幾日既,善用手提行李既重量
- 好多時買左行李就無得再加大行李重量,所以諗清楚先買
- 有d航空公司寄艙行李唔限件數,可以同同行者夾份買,會抵過分開各自買
- 了解清楚購買寄艙行李既費用,因為有d航空公司後加行李,價錢會貴左
- 如果想後加行李,了解清楚最後要幾時加購,以免太遲後而令費用變得昂貴
一圖盡覽各廉航既行李資訊
各廉航行李分析及購買貼士
AirAsia
AirAsia既行李不限件數,所以可以同同行出發者夾埋買
不過,要係買飛果陣決定好買幾多寄艙行李,因為AirAsia之後加購價錢係會貴左!
相關行李詳情:http://www.airasia.com/hk/zh/baggage-info/checked-baggage.page
Air Busan釜山航空
廉航黎講佢都算唔話得,其實同你坐非廉航無咩大分別,佢已經包左你20kg寄艙行李
同一booking仲可以share大家既行李重量,所以真係無咩行李煩惱架喇坐釜山航空
不過就無得加大行李,超過20kg就要當行李超重咁計
相關行李詳情:https://tw.airbusan.com/content/common/service/baggage/free
HKexpress
HKexpress相信會係香港人接觸得比較多既廉航,行李方面不限件數,所以可以同同行出發者夾埋買
不過,要係買飛果陣決定好買幾多寄艙行李,因為HKexpress之後加購價錢係會貴左勁多!!!!
切記買飛前,同同行者要傾好買幾多行李,唔好蝕俾佢呀大佬!
相關行李詳情:http://www.hkexpress.com/zh-hk/learn/baggage-guide/checked-baggage
Jeju Air 濟州航空
濟州航空既行李,可以話係以上廉航黎講最複雜既!因為有d優惠佢會包你15kg寄艙行李,有d就唔包
所以買飛果陣要睇清楚究竟有包定無包!無包就要自己加購
而濟州航空既行李係會以件數計,無得夾埋同行者黎買
相關行李詳情:https://www.jejuair.net/jejuair/serviceinfo/airport/baggage_service.jsp
Jetstar 捷星航空
Jetstar 既行李不限件數,所以可以同同行出發者夾埋買
不過,要係買飛果陣決定好買幾多寄艙行李,因為Jetstar 之後加購價錢係會貴左!
相關行李詳情:http://www.jetstar.com/hk/zh/flights/baggage
Jin Air 真航空
Jin Air免費包左15kg寄艙行李,不過就無得另外加買行李重量,如果行李過左15kg就要當超重咁去收費
值得一提既係佢既手提行李重量係廉航之中比較多既,有12kg咁多!
所以,可以好好善用手提行李去彌補返15kg既寄艙行李
相關行李詳情:http://www.jinair.com/Language/CHT/ServiceGuide/Baggage.aspx
Peach 樂桃航空
Peach 既行李以件數計,無得夾埋同行者黎買
不過,購票後先再加行李都唔會有另外收費,可以睇定d諗清楚先再買
相關行李詳情:http://www.flypeach.com/pc/hk/lm/ai/airports/baggage
Scoot 酷航
Scoot既行李不限件數,所以可以同同行出發者夾埋買
不過,要係買飛果陣決定好買幾多寄艙行李,因為Scoot 之後加購價錢係會貴左!
相關行李詳情:http://origin.flyscoot.com/zhtw/fly-scoot/before-you-fly/baggage
Tiger Air 虎航
虎航既行李不限件數,所以可以同同行出發者夾埋買
購票後先再加行李都唔會有另外收費,可以睇定d諗清楚先再買
相關行李詳情:http://www.tigerair.com/hk/zh/baggage.php
Vanilla Air 香草航空
香草航空既行李不限件數,所以可以同同行出發者夾埋買
購票後先再加行李都唔會有另外收費,可以睇定d諗清楚先再買
相關行李詳情:http://www.vanilla-air.com/hk/service/checked-baggage
第四回關於廉航行李就係咁多喇!呢一回綜合左唔同廉航公司加購寄艙行李既資訊
以上既資訊由航空公司網站提供既資料整合而成,供各位參考
一切有關行李最終既條款都係跟返該航空公司為準
之後,Flylum會同大家拆解更多優惠既資訊,密切留意! :)